X
تبلیغات
شپه (موج - آذري ديلينده)
بير تبريزلي مجنونون تركي شعرلري

گلیری نازلی بهار شوقیله پشوازه گئداق

سیندیراق غم یوکونی اوینامالی سازه گئداق

سوپوراق بیز کونولون هرنه توزی توپراقی وار

بیر آخار چشمه کیمین تازه لنیب تازه گئداق

 

تازا ائیل هامیزا بخصوص عزیز یولداشلاریما مبارک اولسون

+ يازي ليب  یکشنبه بیست و نهم اسفند 1389ساعت 16:9  توسط درويش | 
ائوین آباد اولا گل کونلومی ویران ائله دین

سینه می پارچالایب قلبی دولی فان ائله دین

ویرمیسان لبلریوه لاله سایاق بیر قره خال

من سرگشته نیده لبلره حیران ائله دین

تازا قورتارمیشیدیم من کوچه ده اویناماقی

باش گوزه قار گئتیریب همدم پیران ائله دین

+ يازي ليب  یکشنبه هجدهم بهمن 1388ساعت 17:39  توسط درويش | 
ای بولبول گویا سنه من نیله میشم

سنیلین قیش گونومی گورنه بهار ایله میشم

ای گول سن اگر غنچه ایدوبسن دوداقی

دوداقی اوپمک اوچون آهیله زار ایله میشم

********

دئدیم ای شمع سنه پروانه من اوللام

دئدی صبح آچیلیر قوی پر پروانه ده یانسین

دئدیم فریاد ائد رم  جور و جفا بیر بئله ائتمه

دئدی قصدین بودو نا محرم اویانسین ؟

+ يازي ليب  چهارشنبه سی ام بهمن 1387ساعت 10:32  توسط درويش | 
 

غدیر بایرامیز مبارک اولسون

غدیر بایرامی مبارک

 

 

+ يازي ليب  سه شنبه بیست و ششم آذر 1387ساعت 17:38  توسط درويش | 
قربان بایرامیز مبارک اولسون

قربان بایرامی

+ يازي ليب  دوشنبه هجدهم آذر 1387ساعت 17:6  توسط درويش | 

گلیری نازلی بهار شوقیله پشوازه گئداق

سیندیراق غم یوکونی اوینامالی سازه گئداق

سوپوراق بیز کونولون هرنه توزی توپراقی وار

بیر آخار چشمه کیمین تازه لنیب تازه گئداق

اریدیب قارلاری تئز بند سالاق شخته لری

گئیینیب یاشیل قبا چوللرده نازه  گئداق

آچاجاقدور تازا گوللر بهارین هر نفسی

اوخویان بولبولونن ال چالاق آوازه گئداق

هشیار اولماز بولورم هر گول اولا بولبولونن

 ده لی پروانه کیمین گل باهارا یازه  گئداق

قالاجاق یوز گوزی قاره کومورون قیشدا گئدر

بهارین شاد نفسین باشلاییب آغازه گئداق

بولورم مین یولی وار مین اری اولموش گلینین

باغلیارکن هامیسین گویلره پروازه گئداق

بیر سبد گول گئتیریب مهر و وفا پخش ائله دیم

مشتری کوچه ده یوخ کشف ائلیوب رازه گئداق

می حافظ چاغیریر سعدی گلستانین آچیب

همره اؤل درویشینن اولکه شیرازه گئداق

 

 

بهاریه

 

+ يازي ليب  یکشنبه بیست و ششم اسفند 1386ساعت 12:11  توسط درويش | 

 

بهار گلیب یای اولدی                           قهوه دونوب چای اولدی

هامی دئییب دانیشدی                        بیر سوز دئدیم های اولدی

    *********************

گونوب باتیب آی اولدی                           ایشمده لای لای اولدی

اوزوم گئجه آج یاتیب                             منیم غذام پای اولدی

          *********************

بهار گلیب قیش اولماز                          عاشق یاردان آیرلماز

بو شانسی کی منده وار                     هئچ کیم منه تای اولماز

      *******************

سنی گوردوم هاردا من                       گونی سئودیم یایدا من

آیلار گئچدی گلمدون                            گل قالمیشام داردا من

+ يازي ليب  دوشنبه بیستم اسفند 1386ساعت 10:7  توسط درويش | 

بو گئجه

غم توتوبدور کونولی یوخ منه همدم بو گئجه

سئل کیمین چایلار آشیر گوز یاشی شبنم بو گئجه

گون گئدیب گوز قارالندان صونرا گلسه وطنه

منی آی اولدوزونان دفن ائدین اولسم بو گئحه

یئل چالیر قاپ باجانی من نه بولوم قصدی ندور

جام اجل الده گلیر یا منه مرهم بو گئجه

گل کونول دردیوی ده آه و فغان ائتمه بئله

حل ائدر نازلی طبیب دردیوی بولسم بوگئجه

لطف ائله دردلی کونول سویلمه هجران سوزونی

بو سوزون رعشه سالیر جانیمه هردم بو گئجه

سالمیشام بندلری دنیادا بندیم داهی یوخ

اولسامی بنده دچار زولفونه بندم بو گئجه

جان چیخیر یوللاری گوزلور ولی خسته ایکی گوز

جانی تقدیم ائدرم دلبری گورسم بو گئجه

من کی پروانه صفت یانماغا عادت ائله دیم

هارا گئتسم بولورم شمع ئیله  گللم بو گئجه

فرقتین ظلمونه من بسله میشم صبر آغاجین

بیر شیرین میوه سینی شوقیله دررم بو گئجه

دلبریم لطف ائلییوب کلبه درویشه گله

یارالی قلبیمینن تئللریین هوررم بو گئجه

 

+ يازي ليب  دوشنبه سیزدهم اسفند 1386ساعت 12:54  توسط درويش | 

یوزون گوردوم آیدا من                       زولفون هوردوم چایدا من

ای بی وفا هارداسان                      گل قالمیشام داردا من

********

عزیزیم چورک سنون                     ساچ لارین هورک سنون

گونوم باتیب گئجه اولدی                    یوزووی گورک سنون

  ********

عزیزیم سن هارداسان                   یای داسان بهارداسان

    آختاریب یورولموشام                     اوزون دئنه سن هارداسان

 *********

دوست دوستلاردان آیریلماز            هر کیمسه دن یار اولماز

غملی اولان اورک لر                دوغری گولوب شاد اولماز   

+ يازي ليب  چهارشنبه بیست و چهارم بهمن 1386ساعت 12:44  توسط درويش | 

قیش ویران قلبلرین یوخ گوزه لیم دلبری اولماز

بیر قوشی شاختا ویرا جاندا گئدر شهپری اولماز

بیر آغاج ریشه سینی یاندیرا گر اودلی هوس

باغبانلار یغیشا میوه وئریب عنبری اولماز

گر گوزللیک لر اولا میندانا رنگ ویرماقینان

هر گلن جنسه باخار بیرجه نفر مشتری اولماز

بیری گر یولداش اولا آیینا کیمین صادق اولار

توتماسا الدن اگر ضربه ویریب خنجری اولماز

دنیا دا دوز و کلک اهل ریا چوخدور اوغول

اولسا خالص بیریسی دوز و کلک دفتری اولماز

 یاخشی باخیش صاحبی اؤل ای گوزه لیم

هرزادی یاخشی گورن شاد یاشیار غملری اولماز

درویشیم چوخدو سوزون یازماقا اما بیلورم

اوخویان حق سوزووی هئی تله سر وقتلری اولماز

 

+ يازي ليب  چهارشنبه دهم بهمن 1386ساعت 14:32  توسط درويش | 
اول گئدن گلسه اگر گلشنیم الوان اولاجاق

اولکه مین هر طرفی روضه رضوان اولاجاق

گل گینن منتظر اول صبحه قَدر یاتما کونول

انتظار باشه چاتیب هجرینه پایان اولاجاق

سالیب کولکه سینی شمسیمه هجران آغاجی

سالاجاق پرده لری گل یوزی خندان اولاجاق

او گوزل خاطریوه اولدوز آخیب قاش گوز ائدر

گله سن بیر گئجه سن آی بیزه مهمان اولاجاق

تشنه دور کل جهان آختاریری ساقی عشق

عشقه باخ تشنه لییب سنسیز او بی جان اولاجاق

سسلیور عدلیله داد هستی ده هر زره کی وار

عدل و دادیندا سوزی نرگس مستان اولاجاق

بیر بئله جور و جفا ائتمه سن ای فصل خزان

گلسه اول عادل اگر قاضی دیوان اولاجاق

عمر اگر قیلسا وفا بیر گئجه درویش سنیلن

گوره سن شمس ولایت نئجه تابان اولاجاق

+ يازي ليب  سه شنبه دوم بهمن 1386ساعت 17:22  توسط درويش | 
کربلا اؤزی عشقه کعبه دور، مروه و صفاسی دا وار حسین

نینوا  اولور آیری بیر آدی ، محنت و بلاسی دا وار حسین

کاروانه دئه بوردا دورماسین، خیمه گاهیوی بوردا قورماسین

ایستی قوملاری قورخولو گئجه، غملی بیر هواسی دا وار حسین

+ يازي ليب  یکشنبه سی ام دی 1386ساعت 10:12  توسط درويش | 

منتظر قالدي گوزوم محفيله ياريم گله جك  

 بئله مدهوش ائلين مست و خماريم گله جك

نئچه گوندور كي گئجه صبحه قدر ياتماميشام

گوزلورم يول لاري من نازلي نگاريم گله جك

دئديلر بير گولونن اولميا ياز اما ولي

مژده وئردور منه بير گول كه بهاريم گله جك

گرچه غربتده قالان بير قوشا بنظر اوره گيم      

اول گئدن گلسه اگر ايل و تباريم گله جك

گوزلرينن كونولي صيد ائليوب دامه ساليب       

 نئجه اعلان ائلييم صيد و شكاريم گله جك

گر شتاب ائيلمه سه گلماقا جانان بولورم          

منه همدم بو گئجه آهيله زاريم گله جك

دلبرين كوي ئينه گئتماخ همي ده باد صبا        

گلمه سن منتظر اول سنگ مزاريم گله جك

اميدي بسله اورك ده هله درويش صبور اول   

آي چيخيب قاش گوز ائدير شمس وقاريم گله جك

+ يازي ليب  جمعه بیست و یکم دی 1386ساعت 14:3  توسط درويش | 
  دورد گوشه میخانه نی الوان ائله دیم

  بیر نگارین سوزونه گوزلری قربان ائله دیم

  او گوزل یول لارینی یئدی دفعه پاک ائلیوب

  داشلارینان نئجه من شیطانا طغیان ائله دیم

  کعبه بت خانه اولوبدور دئیه سن صاحبی بت

  بتا من عاشق اولوب کعبه نی عنوان ائله دیم

  سینه ده چوخ چالیشیر قانلی کونول سنن اوتور

  سنده بیر صحبت ائله مجنونی مهمان ائله دیم

  سن منیم حاليمه  باخ مرو و صفانی گزیرم

  دئگینن بولبولی من عاشق و حیران ائله دیم

  قاشلارین ائدی کمان سئویله دی دلبر بو سوزی

  سنی نالان ائلیین مشکلی آسان ائله دیم

  بیر دانا اوخدور گلییر هدیه دی مندن سنه بو

  چوخلاری آختاریری من سنه احسان ائله دیم

  دلبرین خاطری نازک اولو درویش دئگینن

  قورخورام قهر ائلیه چوخ سوزی پنهان ائله دیم

+ يازي ليب  شنبه پانزدهم دی 1386ساعت 9:26  توسط درويش | 

الهی گوزلریم جانانی گوزلور

ائله یالقوز قالیب مهمانی گوزلور

نئجه ساکت قالیب غوغالی کونلوم

دمادم یئل اسیر طوفانی گوزلور

ایکی گوزدن گلن شبنم تکین یاش

آشیب چایلار داشیب دریانی گوزلور

فدای عشق اوچون گلمیش منایه

عجب آماده دور فرمانی گوزلور

گلیب بولبول چمندن آه و زاره

گمان شوریده دور سامانی گوزلور

او قدر گل ناز ائدیب بیچاره بولبول

اوزوب ال وصلیدن هجرانی گوزلور

هامی گویچک لری کنار ائدیر دل

ده لی مجنون کیمی لیلانی گوزلور

جمال دلبرین وصلینده درویش

آتیب صورتلری معنانی گوزلور

+ يازي ليب  پنجشنبه ششم دی 1386ساعت 11:44  توسط درويش | 
دئديم اي گول منه تاي راضي به ديدار اولاسان

لطف ائديب گله سن بير لحظه منه يار اولاسان

من مجنون اولوب داغ داشي هر گون گزيرم

نه اولار سنده گليب ليلي دلدار اولاسان

سن اولوب دختر ترسا و كليسايه ده گئدسن

شيخ صنعان اولارام شاهد زنَار اولاسان

بئله سن  سئويلدون آخر منه ديوانه سر

گوره بيلمييه سن مگر عاشق زار اولاسان

مني گر ايسته ئيرسن صدق و وفائيله ،گرك

يوخوني گوزدن آتيب هر گئجه بيدار اولاسان

راحت جان اوتوروب يوز قوياسان رنج و غمه

همي فرهادي گئچيب عازم داغلار اولاسان

ايسته سن عرشه چخيب يارين جمالين گوره سن

منصوري يئرده قويوب مشتري دار اولاسان

دئدي درويش اگر وصل نگار آختاريسان

بير عمر مي ايچيب لحظه اي هوشيار اولاسان

+ يازي ليب  دوشنبه سوم دی 1386ساعت 9:23  توسط درويش | 
.

بو گونلر درب و داغونم گئچن آراميشيم هاردا ؟

توگولدو  زولف لر باشدان آغيزدا ديش ميشيم هاردا؟

 

                                   قفسده بير اسير بولبول هارايلار هانسي آوازي ؟

                                  سالار ياده گلستاني اوخور آسايشيم هاردا ؟

 بلبل و قفس

 بلبل و گلستان


مطلبين داليسي
+ يازي ليب  پنجشنبه بیست و نهم آذر 1386ساعت 9:49  توسط درويش | 

  

    هاردادور فصل بهار جسميمه جان آختاريرام    

    بو سولان قلبيمه من روح و روان آختاريرام

   چوخ قالير گوللر آچا تازه نفس بيرده گله           

   اولاري گورمك اوچون تاب و توان آختاريرام

   نه اولار دامه سالا بولبولي نوروز هوسي           

   سينديران دار قفسي گويده اوچان آختاريرام

   نرگسين گوزلرينه عاشق اولوبدور اوره گيم      

   اول گولون چادراسيني يوزدن آلان آختاريرام

   سوسني سويوخ وريب دور قار اليندن دورا بيلمز    

   سويله بايرام يئلينه مشكل آچان آختاريرام

   توخويور بيرده هوس كهليگه زندان تله سي       

    بئله شيطاني توتوب داردان آسان آختاريرام

   اوجا بوي شمسه دئديم  هاردا قاليب نازلي بهار   

    گوزلرين سيلدي دئدي كل جهان آختاريرام

   سفر ائديم يوخودا باغدا چيچك سونبولونن        

   دادي قالدي داماغيمدا تازادان آختاريرام

   لاله لر خاطرينه ياتمادي درويش گئجه ني     

    تاپدي آختارديغني من تازادان آختاريرام

+ يازي ليب  چهارشنبه بیست و هشتم آذر 1386ساعت 8:46  توسط درويش | 
اشتباهي من دوشونوب بيلميشم

اوز اوزومه ده لي كيمين گولميشم

دونن كي شعرلري بويون سيلميشم

عذر ايستيرم سيزدن عزيز يولداشيم

ايسته ميرديم اينجيه سيز قارداشيم

 

بوندان سونرا منيم ديليم لال اولسون

يولداشلاريم جماليزه حال اولسون

آغزيز دولي شكر اولسون بال اولسون

بوندان سونرا من ديليمي باغلارام

شيش گوتوروب ال قولوني داغلارام

 

من بيليرم عمر آپارار روزگار

كيم ايسته سه آدي قالا يادگار

اولا يادي بو صفحه ده ماندگار

اوزي دئسين نظمه چئكيم ياديني

يوخسا داي من آپارمارام آديني

+ يازي ليب  سه شنبه بیست و هفتم آذر 1386ساعت 12:39  توسط درويش | 
بو دفترين اول شعرينده تبريزلي بويوك شاعريميز استاد شهرياردان  ياد ائليب و اونون حيدربابا سبكينده

نئجه سطر عزيز يولداشيم ناصريه تقديم ائديرم . همان عزيز که بو دفتر اونون دستوريلان آچيليب:

 

قيش گئجه سي چراغميز ياناردي

ناصري ده شب چره ني قوراردي

سونرا دوروب ائيلدرملار  وراردي

آي نه گوزل ايشيق سالار ائيلدريم

تب لي لرين تبين آلار ائيلدريم

 

 فكر ائليرديم بو جور بير شعرلر يازماغينان همكارلارين دوداقلارينا گولسوم ( لبخند) گئتيررم اما  قولاقيما يئتيشدي بو سوز كه منيم بير عزيز يولداشيم بو شعرلردن ناراحت اولوب بونا گورا كي اصلا قصديم يوخدور حتي بيرجه نفر ناراحت اولا شعر لرين ادامه سين سيليب و فعلاً بو بارده ( سهند همكارلاري ) داهي يازميرام شايد بير گون... و مگر بو كي افراد اوزي اجازه وئره

هامييز شاد قاليب شاد ياشايين.

+ يازي ليب  شنبه بیست و چهارم آذر 1386ساعت 12:17  توسط درويش |